Pas dy javësh pa fitore, Rilindja 1974 më në fund ka gjetur rrugën e fitores, duke mposhtur Vjosën me rezultat bindës 3-1 në kuadër të Ligës së Parë. Për skuadrën e drejtuar nga Faruk Statovci, kjo ishte fitorja e parë pas dy humbjeve radhazi, ndërsa Vjosa regjistroi humbjen e tretë rresht.
Trajneri Statovci u shpreh pas ndeshjes për Kërlaçkin, duke vlerësuar përkushtimin e lojtarëve të tij dhe mënyrën se si ekipi reagoi sidomos në pjesën e dytë të takimit.
“Pas dy humbjeve radhazi, sot erdhëm te fitorja që mendoj se ishte e merituar për ne. Në përgjithësi jam i kënaqur me angazhimin e futbollistëve të mi, me rezultatin e arritur, veçanërisht për pjesën e dytë. Në 30 minutat e fundit mbetëm me një lojtar më pak në fushë, por gjithsesi arritëm ta mbyllim ndeshjen në mënyrë pozitive”, u shpreh Statovci.
Fitorja vjen si një frymëmarrje për Rilindjen 1974, që synon të ngjitet në renditje dhe të ruajë vazhdimësinë në javët në vijim, ndërsa kriza e rezultateve për Vjosën thellohet.
