Samuel Umtiti ka njoftuar largimin nga futbolli profesionist në moshën 31-vjeçare pas një karriere të lavdishme të shoqëruar me trofe të shumtë dhe momente historike.
Vendimi i tij erdhi si pasojë e dëmtimeve të vazhdueshme në gju, të cilat i pamundësuan rikthimin në nivelin më të lartë të futbollit. Së fundmi ai ishte pjesë e Lille në Francë, ndërsa një sezon më parë aktivizohej në Serie A me Lecce. Lëndimet kronike që e përndoqën veçanërisht pas vitit 2018 e shoqëruan deri në fund, duke bërë që të largohet në heshtje nga skena ndërkombëtare.
Kulmi i karrierës së Umtiti ishte padyshim triumfi me Francën në Kupën e Botës “Rusia 2018”, ku ishte titullar absolut dhe realizoi golin e fitores në gjysmëfinalen ndaj Belgjikës. Përveç Botërorit, Umtiti numëron edhe 8 trofe madhorë në nivel klubesh. Me Barcelonën ai fitoi 2 herë La Liga, 3 herë Copa del Rey dhe 2 Superkupa të Spanjës. Me Lyon fitoi Coupe de France dhe Trophée des Champions. Pavarësisht periudhës së vështirë në pjesën e dytë të karrierës, ai do të mbahet mend si një mbrojtës me inteligjencë taktike, aftësi teknike dhe përkushtim maksimal në çdo ndeshje.
Samuel Umtiti largohet nga futbolli si një kampion bote dhe si një nga mbrojtësit më të rëndësishëm të Francës në dekadën e fundit, duke lënë pas një trashëgimi të çmuar për brezat e rinj.
