Shannon Sharpe, ish-yll i futbollit amerikan dhe analist sportiv 56-vjeçar, është larguar nga ESPN pasi arriti një marrëveshje në një proces gjyqësor për sulm seksual. Largimi i tij nga rrjeti televiziv, ku ishte një nga figurat kryesore të emisionit “First Take”, ndodhi pak kohë pasi akuzat ndaj tij dolën në faqet e para të mediave. Paraqitja e tij e fundit në ESPN ishte në prill të këtij viti.
Akuzat ndaj Sharpe, i cili është pjesë e “Hall of Fame” të NFL-së, u paraqitën nga Gabrielle Zuniga, një krijuese përmbajtjesh 20-vjeçare, e cila fillimisht u identifikua si “Jane Doe” për të ruajtur anonimitetin. Ajo pretendon se Sharpe e ka dhunuar seksualisht disa herë gjatë viteve 2024 dhe 2025, dhe kërkoi një dëmshpërblim prej 50 milionë dollarësh.
Kush është Gabrielle Zuniga?
Zuniga ka një prani të madhe në rrjetet sociale me mbi 500 mijë ndjekës në Instagram dhe një llogari të suksesshme në “OnlyFans”. Ajo ka deklaruar se marrëdhënia me Sharpe filloi në vitin 2023, kur ishte 19 vjeç. Në padinë e paraqitur në Nevada, marrëdhënia përshkruhet si abuzive dhe e detyruar, me akuza për filmime pa leje dhe manipulim psikologjik.
Një prej incidenteve kyçe thuhet të ketë ndodhur në shtator 2024 dhe, sipas Zunigës, është transmetuar gabimisht drejtpërdrejt në Instagram. Ajo përshkruan se është kërcënuar, dhunuar fizikisht dhe seksualisht, dhe madje ka pasur raste kur Sharpe ka qenë i armatosur.
Sharpe mohon gjithçka
Sharpe i ka mohuar kategorikisht akuzat. Ekipi i tij ligjor pretendon se marrëdhënia ka qenë plotësisht konsensuale dhe e akuzon Zunigën për përpjekje për shantazh. Avokati i Sharpe, Lanny J. Davis, e quajti padinë “një përpjekje cinike për të nxjerrë miliona dollarë nga zoti Sharpe”.
Nga ana tjetër, avokati i Zunigës, Tony Buzbee – i njohur për përfaqësimin e klientëve në çështje kundër figurave publike – deklaroi se rasti është serioz dhe do të shkojë në gjyq. Ai publikoi edhe një incizim zanor ku Sharpe thuhet se e kërcënon Zunigën se do ta mbysë.
Në një nga episodet e raportuara, Zuniga pretendon se ka tentuar të ndajë vendndodhjen e saj me miqtë për shkak të frikës, por Sharpe e ka ndalur duke e kapur për fyti dhe duke i thënë, “Nëse e bën përsëri, do të të vras”. Më pas, në shtator të 2024-ës, pasi kishte tentuar të ndante marrëdhënien, ajo pretendon se u përdhunua. Ngjarje të tjera të dhunshme raportohen edhe në tetor dhe janar të këtij viti.
Karriera e Sharpe
Sharpe iu bashkua ESPN në vitin 2023 pas largimit nga FOX dhe shumë shpejt u bë një nga fytyrat më të njohura të “First Take”. Në qershor, ESPN mbështeti vendimin e tij për t’u tërhequr përkohësisht derisa situata të sqarohej. “Kjo është një situatë serioze dhe ne mbështesim vendimin e Shannon për t’u tërhequr”, njoftoi rrjeti në atë kohë.
Megjithëse Sharpe i quajti akuzat një përpjekje për shantazh, në fillim të këtij muaji ai arriti një marrëveshje konfidenciale me Zunigën. Nuk janë ngritur akuza penale ndaj tij.
Përpara se të bëhej figurë televizive, Sharpe pati një karrierë të shkëlqyer në NFL, ku konsiderohet një nga lojtarët më të mirë në rolin e tij, duke kombinuar aftësitë e pritjes dhe mbrojtjes. Ai luajti për Denver Broncos dhe Baltimore Ravens.
