Suedia duket edhe më e frikshme se Zvicra

Suedia zbret sot në Prishtinë për ndeshjen e dytë kualifikuese të Kupës së Botës me një përzierje pritshmërish të larta dhe dilema të mëdha. Kombëtarja e drejtuar nga Jon Dahl Tomasson e nisi garën me një barazim ndaj Sllovenisë, por vazhdon të ketë pikëpyetje për formën e disa prej yjeve të saj.

Alexander Isak, sulmuesi i Liverpool-it, nuk u aktivizua në sfidën e parë për shkak të mungesës së përgatitjeve gjatë verës dhe stafi teknik ka lënë të hapur mundësinë që ai të përdoret vetëm pjesërisht.

Në plan të parë janë dyshja Viktor Gyökeres dhe Anthony Elanga. Gyökeres vjen nga një sezon fantastik te Sporting, ku u shndërrua në një makineri golash, ndërsa Elanga, tashmë lider i Nottingham Forest, i dha ritëm dhe shpejtësi ekipit në debutimin e parë të kualifikueseve. Pas tyre, mesfusha e përbërë nga Hugo Larsson dhe Yasin Ayari shihet si garancia për ekuilibër, energji dhe qarkullim të topit.

Pritshmëritë në Suedi janë të qarta: në Prishtinë duhet fitore. Mediat suedeze flasin për një skuadër që ka pjekurinë e nevojshme për të përballuar atmosferën elektrizuese të stadiumit “Fadil Vokrri”, duke theksuar se përvoja ndërkombëtare e lojtarëve që luajnë në ligat më të forta të Europës duhet të bëjë diferencën. Sidoqoftë, paralajmërohet se ndeshja nuk do të jetë e lehtë. Kosova, në shtëpinë e saj, e mbështetur nga tifozët e zjarrtë, mund të shndërrohet në një pengesë të vështirë dhe çdo minutë do të kërkojë qetësi dhe përqendrim maksimal nga suedezët.

Në prag të ndeshjes, Suedia shihet si favorite e madhe, por gjithashtu është e vetëdijshme se një rrëshqitje në Prishtinë do të komplikonte që në nisje rrugëtimin drejt Botërorit. Për këtë arsye, të gjithë sytë janë te Gyökeres dhe Elanga për golat, ndërsa rikthimi i mundshëm i Isak-ut shihet si arma e fshehtë për të thyer rezistencën e Kosovës.