Federata Boliviane e Futbollit ka marrë një vendim strategjik që po shihet si një nga arsyet pse ata vazhdojnë të ëndërrojnë Kupën e Botës 2026.
Përfaqësuesja e tyre ka shfrytëzuar në maksimum një faktor të njohur – lartësinë mbidetare.
Në shtatorin e kaluar, Bolivia vendosi të zhvendosë ndeshjet e saj në shtëpi nga stadiumi historik Estadio Hernando Siles, i cili ndodhet në 3,637 metra mbi nivelin e detit, drejt një terreni edhe më ekstrem: Estadio Municipal El Alto, që gjendet në 4,088 metra lartësi.
Ky ndryshim ka bërë që kundërshtarët të vuajnë edhe më shumë kushtet e vështira.
Që nga ky vendim, statistikat flasin vetë. Bolivia është e pamposhtur në gjashtë ndeshje në shtëpi, duke regjistruar katër fitore dhe dy barazime.
Për një skuadër që shpesh ka pasur vështirësi për t’u përballur me rivalët e mëdhenj të Amerikës së Jugut, ky është një progres i ndjeshëm.
Tani, me moralin e lartë dhe një avantazh të qartë që vjen nga terreni, Bolivia e sheh veten ende në garë për një biletë drejt Botërorit.
