Zyrtare: Yusif Imanov, portieri nga Azerbajxhani, i bashkohet FC Malishevës

Yusif Imanov
Yusif Imanov

FC Malisheva ka bërë të ditur transferimin e portierit të ri, Yusif Imanov, një prej talenteve më premtues në futbollin azer. Gardiani 22-vjeçar, që vjen nga Sabah FK, është pjesë e kombëtares së Azerbajxhanit dhe konsiderohet një përforcim i rëndësishëm për klubin kosovar.

Imanov ka zhvilluar 94 paraqitje zyrtare në karrierën e tij, prej të cilave 80 ndeshje në elitën e futbollit azer, Premyer Liqa, 8 ndeshje në kualifikimet për Ligën e Konferencës dhe 6 të tjera në Kupën e Azerbajxhanit. Në total, ai ka arkëtuar 37 ndeshje pa pësuar gol, duke treguar konsistencë dhe siguri në portë.

Karriera e tij nisi me ekipin U19 të Sabah FK, për të vazhduar më pas me Sabah 2 dhe më pas me ekipin e parë. Kalimi i tij te FC Malisheva vjen pas përfundimit të kontratës me klubin azer, ndërsa vlera e tij në treg llogaritet rreth 600 mijë euro.

Ky transferim shënon një tjetër hap të rëndësishëm në projektin afatgjatë të Malishevës, që synon ndërtimin e një skuadre konkurruese dhe stabile në futbollin kosovar.