Nga 4 deri më 14 shtator, Liverpooli është nikoqir i Kampionatit Botëror të Boksit.
Në ditën e dytë të garave, më 6 shtator, boksieri kosovar Shpëtim Bajoku (70 kg) u ndal në raundin e parë, pasi u mposht nga britaniku Kamara Odel.
Në të njëjtën ditë, vëmendja do të zhvendoset te Donjeta Sadiku (60 kg), e cila nga ora 18:00 në Ringun “A” do të përballet me sfidën e radhës. Ajo do të ketë përballë nënkampionen e botës, Viktoriya Grafeyeva nga Kazakistani, një emër i madh i boksit amator. Përballja e Sadikut është e shtata në programin e mbrëmjes.
Federata e Boksit të Kosovës ka bërë të ditur se ekipi kombëtar është i gatshëm të përfaqësojë denjësisht vendin, ndërsa sfida e Donjetës pritet të jetë një nga momentet kulmore për sportdashësit kosovarë në këtë Botëror.
