Brentford shuan festën e Chelseat me gol në minutën e 94-të

Fábio Carvalho ishte heroi i Brentford, duke shënuar një gol të vonë në minutën e 94-të dhe duke i dhënë ekipit të tij një barazim dramatik 2-2 ndaj Chelseat në “Gtech Community Stadium”. Edhe pse rezultati i lë “Blutë” pa fitore, ata ruajnë ecurinë e pamposhtur në kampionat.

Pas pushimit të kombëtareve, trajneri Enzo Maresca u përball me disa zgjedhje të vështira për formacionin. Enzo Fernández dhe Moisés Caicedo, të sapokthyer nga Amerika e Jugut, u aktivizuan nga minuta e parë, ndërsa Marc Cucurella, kapiteni Reece James dhe Estêvão (i sëmurë) mbetën jashtë ose në stol. Mungesa e Cole Palmer në 11-në startuese ndikoi ndjeshëm në lojën e Chelseat, sidomos në pjesën e parë pa shumë gjallëri.

Në atë pjesë, Brentford ishte më efikas. Me vetëm dy goditje në portë, ata realizuan një gol kur Jordan Henderson asistoi bukur për Kevin Schade, i cili pasi shmangu Adarabioyon, goditi dhe shënoi me ndihmën e një devijimi të lehtë. Chelsea kërcënoi vetëm në fund të pjesës, kur këndi i Fernández goditi shtyllën.

Pjesa e dytë nisi me Brentfordin në kërkim të një goli të dytë, por futja në lojë e Reece James dhe Cucurellas riktheu balancën për londinezët. Megjithatë, ishte Cole Palmer ai që bëri diferencën. Sapo hyri në fushë, ai shënoi një gol të bukur me një goditje të saktë në cepin e portës, duke barazuar rezultatin.

Më pas, të dy ekipet kërkuan fitoren. Schade testoi portierin Sánchez, ndërsa Palmer humbi një rast të artë pas një asistimi nga Pedro Neto. Në fund, Chelsea dukej se e kishte përmbysur gjithçka: debutuesi Alejandro Garnacho depërtoi nga krahu dhe pasimi i tij çoi në një gol të fuqishëm nga Caicedo, për 1-2.

Por Brentford nuk u dorëzua. Në minutën e fundit shtesë, pas një rivënie të gjatë nga Schade, topi shkoi te Carvalho, i cili shënoi nga afër, duke e lënë Chelsean me vetëm një pikë dhe pa mundur të ngjitet në krye të tabelës. Blutë tani përgatiten për sfidën e radhës ndaj Bayern Munich në Ligën e Kampionëve.