Skuadrat shqiptare që po garojnë në raundin e parë të Ligës së Konferencës dhe Ligës së Evropës kanë përmbyllur ndeshjet e para me vetëm një fitore dhe katër rezultate negative.
Si u paraqitën:
Sheriff 4-0 Prishtina
Kampioni i Moldavisë dominoi Prishtinën në Tiraspol. Bayala realizoi hat-trick dhe Odede shënoi golin e katërt. Prishtina pati disa raste të mira me Mujën, Veliun e Baftiun, por nuk arriti të konkretizojë. Sfida e kthimit luhet në “Fadil Vokrri”.
Malisheva 0-1 Vikingur Reykjavik
Në debutimin e saj evropian, Malisheva u mund në Prishtinë nga ekipi islandez. Goli i vetëm u shënua në fund të pjesës së parë. Djemtë e Bekim Isufit patën disa raste për të barazuar, por nuk ia dolën. Shpresat mbeten për ndeshjen e kthimit në Islandë.
Deçiq 2-0 Sileks
Skuadra shqiptare nga Tuzi fitoi bindshëm në shtëpi. Bajović dhe Ndiaye realizuan për fitoren ndaj Sileksit. Ishte hera e parë që Deçiq luan një ndeshje evropiane në stadiumin e vet. Debutuan edhe Trimor Selimi e Arlind Maloku.
Vllaznia 0-1 Daugavpils
Në “Elbasan Arena”, Vllaznia dominoi, krijoi raste me Dodajn, Balajn dhe Qaton, por u ndëshkua në minutën e 85-të nga një goditje me kokë e Lizunovs. Ndeshja e kthimit në Letoni do të jetë shumë e rëndësishme për të kthyer shpresat.
Kalju 1-1 Partizani
Partizani luajti si mysafir në Estoni ndaj Kalju. Skuadra vendase shënoi në fillimin e pjesës së dytë, por Skuka barazoi menjëherë pas një aksioni të bukur me Martinez. Në fund, të kuqtë patën disa raste për të përmbysur, por pa sukses. Ndeshja kthyese luhet në Tiranë.