Mallorca arriti të marrë një pikë të vlefshme ndaj Atletico Madridit, falë golit të Vedat Muriqit, i cili barazoi rezultatin në minutën e 85-të të ndeshjes së xhiros së pestë të La Ligas.
Pavarësisht se skuadra e Diego Simeones po shkonte drejt fitores me epërsinë 1-0 dhe kishte mbetur me një lojtar më pak që nga minuta e 72-të, Muriqi tregoi klas dhe shënoi një gol të bukur pas një krosimi, duke siguruar barazimin 1-1.
Për sulmuesin kosovar ky ishte gol i tretë ndaj Atleticos, pas atyre më 9 prill dhe 9 nëntor të vitit 2022. Edicionin e ri Muriqi e ka nisur me katër gola në pesë ndeshje kampionale, përfshirë edhe golin për Kosovën ndaj Suedisë më 8 shtator.
Ai vazhdon të tregojë se është një sulmues i rrezikshëm dhe një pikë referimi për Mallorcan, pavarësisht situatës së vështirë të skuadrës në tabelë, e cila aktualisht ndodhet në vendin e parafundit me vetëm dy pikë.
“Jam shumë, shumë i lumtur. Për një sulmues, shënimi i golave, madje edhe në miqësore, gjithmonë vlen. Të jep vetëbesim. Tani vetëbesimi im është në kulm dhe shpresoj se nuk do të ndalem me kaq, por të vazhdoj ta ndihmojë ekipin të fitojë pikë dhe të fitojmë ndeshje”, ka theksuar Muriqi.
Trajneri i Mallorcas, Jagoba Arrasate, shtoi: “Ai ka shënuar katër gola, kështu që duhet ta shërbejmë më mirë. Ndihet më rehat në fund të ndeshjes, kur ka krosim, sesa kur duhet të largohet nga zona. Doli nga fusha i lodhur, por me katër gola në pesë ndeshje jam i sigurt se dëshiron të jetë në ndeshjen e ardhshme”.
Mallorca kishte nisur sezonin me humbje 3-0 ndaj Barcelonës, më pas barazoi 1-1 me Celta Vigon, ndërsa pësoi humbje ndaj Real Madridit dhe Espanyolit. Me golin ndaj Atleticos, skuadra siguroi pikën e dytë të sezonit, ndërsa Muriqi vazhdon të konfirmojë formën e tij të shkëlqyer, duke qenë një lajm i mirë për tifozët e Kosovës. Sulmuesi prizrenas do të ketë mundësi të shfaqë talentin e tij edhe më 10 tetor, kur Kosova përballet me Slloveninë në “Fadil Vokrri”, përballë portierit Jan Oblak.
Deklaratat e Muriqit dhe trajnerit Arrasate tregojnë qartë se sulmuesi është i motivuar dhe i fokusuar për të ndihmuar skuadrën të marrë rezultate pozitive, edhe pse Mallorca vazhdon të ketë një nisje të vështirë sezoni në La Liga.
