Klubi i futbollit Llapi ka zyrtarizuar huazimin e sulmuesit Ardit Tahiri te skuadra më e madhe finlandeze, HJK Helsinki. Marrëveshja është e vlefshme deri më 31 dhjetor 2025, me opsion për transferim të përhershëm pas përfundimit të periudhës së huazimit.
Sipas njoftimit të klubit llapjan, kontrata është finalizuar disa ditë më parë, ndërsa Tahiri do t’i bashkohet ekipit të ri gjatë kësaj jave. Llapi theksoi se nuk ka dashur të pengojë lojtarin në një hap të rëndësishëm për karrierën e tij, duke përfituar gjithashtu financiarisht nga marrëveshja dhe duke ruajtur një përqindje në kartonin e tij.
Tahiri iu bashkua Llapit sezonin e kaluar nga Dinamo City, ku pati një edicion mbresëlënës: 19 gola dhe 4 asistime në 44 paraqitje zyrtare.
Klubi bardhekaltër ka falënderuar sulmuesin për kontributin dhe përkushtimin, duke i uruar sukses në aventurën e re me kampionët e Finlandës.
Përndryshe Llapi nuk ka startuar mirë në edicionin e ri, ka luajtur pa gola me Drenicën në Skenderaj dhe është mposhtur thellë nga Prishtina në “Fadil Vokrri”, 3-0.
