Luciano Spalletti ka pranuar se ende nuk e ka kaluar plotësisht largimin nga stoli i Italisë.
Trajneri 66-vjeçar mori drejtimin e “Azzurrëve” në shtator 2023, duke i çuar në Euro 2024. Megjithatë, pas një fillimi zhgënjyes në kualifikueset e Botërorit 2026 – ku Italia pësoi humbje 0-3 ndaj Norvegjisë – ai u shkarkua në qershor 2025.
Duke folur për periudhën e fundit, Spalletti theksoi se mendja i qëndron ende te Italia.
“Përvoja me Italinë më rri akoma në mendje. Nuk kam dashur ta harroj, sepse duhet pranuar gjithçka që sjell ajo përvojë. Gjërat nuk shkuan siç doja, por unë dhashë gjithçka. Më duhet pak kohë për t’u pajtuar me këtë dhimbje, pastaj do të nis sërish.”
Ai nënvizoi gjithashtu se largimi nuk ishte zgjedhja e tij:
“Nëse nuk doja të vazhdoja, do të largohesha vetë. Por unë u shkarkova.”
I njohur për sukseset e tij në Serie A, Spalletti po merr kohë për reflektim përpara se të nisë një aventurë të re në karrierën e tij si trajner.
