Kanadaja
Një nga surprizat më të mëdha në Kampionatin Botëror të Volejbollit për Meshkuj 2025 ndodhi në Grupin G, ku Japonia, favorit i madh për të kaluar fazën e parë, është eliminuar pas humbjes së dytë radhazi me rezultat 3‑0. Kanadaja dhe Turqia janë dy skuadrat që sigurojnë kalimin në 1/8 e finales, duke lënë një ndër skuadrat më të forta të Azisë jashtë garës.
Kanadaja e pandalshme ndaj Japonisë: 3‑0 dhe vend në fazën me eliminim
Në një ndeshje të zhvilluar në Quezon City (Filipine), Kanadaja dominoi plotësisht Japoninë me sete 25‑20, 25‑23, 25‑22, duke regjistruar një nga fitorët më bindëse të turneut. Kanadezët regjistruan 10 bllokime fituese kundrejt vetëm 2 të Japonisë, si dhe 40 sulme të suksesshme kundrejt 33 të kundërshtarit.
Ylli i ndeshjes ishte Sharone Vernon-Evans (Sho), që realizoi 14 pikë me një përqindje suksesi prej 52% në sulm, një ace dhe një bllokim vendimtar që i dha fund ndeshjes. Kapiteni Nicholas Hoag kontribuoi me 13 pikë, përfshirë një ace dhe 12 goditje të pastra, duke regjistruar 60% efikasitet.
“Jemi mbi re! Kualifikimi ishte qëllimi ynë dhe e dinim që e kishim këtë mundësi. Jam krenar për djemtë – lufta e tyre u ndje që nga fillimi. Thjesht nuk u ndalëm”, – deklaroi Sho pas ndeshjes. “Jemi gati për betejën me Turqinë për vendin e parë.”
Japonia jashtë, pavarësisht performancës individuale
Japonia e udhëhequr nga Ran Takahashi, Kento Miyaura dhe kapiteni Yuki Ishikawa, pati më shumë ace (7‑3), por kjo nuk mjaftoi për të ndalur ritmin e Kanadasë. Takahashi dhe Miyaura shënuan përkatësisht 11 dhe 10 pikë, ndërsa Ishikawa shtoi 3 ace, por mbrojtja dhe bllokimi kanadez dominuan plotësisht.
Ky eliminim është një goditje për Japoninë, që vinte në këtë turne si një prej skuadrave më të mira të Azisë dhe me pritshmëri të larta. Ndërsa Kanadaja konfirmon rritjen e saj si një forcë serioze në volejbollin ndërkombëtar. Ndeshja ndaj Turqisë do të përcaktojë se kush do të kualifikohet si lider i grupit – dhe kush do të ketë një short më të favorshëm në raundin e ardhshëm.
Turqia gjithashtu e kualifikuar
Turqia, që më herët gjatë ditës mposhti Libinë, siguroi fitoren e dytë dhe bashkë me Kanadanë kalon më tej në fazën me eliminim. Ndeshja për vendin e parë në grup mes Kanadasë dhe Turqisë do të luhet më 17 shtator, po ashtu si përballja Japoni – Libi për vendin e tretë dhe për një fitore nderi.
Gjermania dhe Kuba regjistrojnë fitoret e para në Botërorin e Volejbollit – mbajnë gjallë shpresat për kualifikim
Kombëtaret e Gjermanisë dhe Kubës kanë shënuar fitoret e tyre të para në Kampionatin Botëror të Volejbollit për Meshkuj “Filipine 2025”, duke mbajtur gjallë shpresat për kualifikim në fazën me eliminim direkt.
Gjermania mposhti Kilin me rezultat të pastër 3–0 (25–17, 25–23, 25–21). Heroi i ndeshjes ishte veterani Gyorgy Grozer, i cili realizoi 19 pikë, ndërsa Erik Rohrs dhe Anton Brehme dhanë gjithashtu kontribut të rëndësishëm në sulm dhe bllokim. Kjo ishte fitorja e parë për gjermanët pas një fillimi të vështirë në grup.
Në ndeshjen tjetër, Kuba tregoi dominim ndaj Kolumbisë, duke fituar gjithashtu 3–0 (25–22, 25–21, 25–20). Me këtë triumf, kubanët mbesin në garë për kualifikim, ndërsa për kolumbianët kjo ishte humbja e tretë radhazi, që i përjashton nga gara. Më të dalluarit për Kubën ishin Osniel Melgarejo me 14 pikë, si dhe José Masso e Marlon Yant.
Të dy ekipet tani përgatiten për ndeshjet vendimtare të grupeve që do të përcaktojnë fatin e tyre në turne.
