Fitorja bindëse e Dinamos së Zagrebit kundër Fenerbahçes (3:1) në ndeshjen hapëse të fazës së grupeve në Europa League ka shkaktuar reagime të forta në Turqi – jo vetëm për rezultatin, por edhe për shkëlqimin e një ish-lojtari të klubit turk.
Ndeshja në “Maksimir” nisi furishëm për vendasit. Dion Drena Beljo shënoi në minutën e 22-të për epërsinë fillestare, por Sebastian Szymanski barazoi vetëm tre minuta më vonë. Beljo realizoi edhe golin e dytë të tij në minutën e 51-të, ndërsa Monsef Bakrar vulosi fitoren 3:1 në kohën shtesë.
Zajc, qendra e kritikave turke
Pas ndeshjes, rrjetet sociale në Turqi u mbushën me komente të zemëruara të tifozëve të Fenerbahçes – dhe shumë prej tyre përqendrohen te Miha Zajc, mesfushori që verën e kaluar u largua pa shumë zhurmë nga klubi turk dhe iu bashkua Dinamos si lojtar i lirë.
Ish-futbollist turk: Asnjë nga Fenerbahçe nuk ishte më i mirë se Zajc
Ish-mesfushori i njohur turk, tashmë në pension, Erman Özgür, ishte i ashpër në analizën e tij:
“Fenerbahçe ishte katastrofal. Me këtë qasje nuk mund të mundësh askënd. Asnjë lojtar nuk ishte më i rrezikshëm sesa Zajc.”
Kovaçeviç falënderon Fenerbahçen për dhuratën
Trajneri i Dinamos, Mario Kovaçeviç, e përmendi Zajcin pas ndeshjes me tone ironike dhe falënderuese:
“Faleminderit stafit të Fenerbahçes që nuk e deshën dhe na e lanë neve. Që në fillim kam dashur ta sjell dhe tani e ka treguar veten. Ai mund t’i përsërisë këto paraqitje dhe do të jetë gjithnjë e më i mirë.”
Karriera e Zajcit
Miha Zajc (31 vjeç) iu bashkua Fenerbahçes në janar 2019, ku grumbulloi 123 paraqitje dhe 20 gola. Gjatë qëndrimit në klub, ai u huazua edhe te Genoa dhe Toulouse. Pas largimit këtë verë, duket se ka rigjetur formën më të mirë në kryeqytetin kroat.
