Mesfushori shqiptar, i cili sezonin e kaluar mbante fanellën e Gorices në Superligën kroate dhe shënoi tre gola ndaj Dinamos, Hajdukut dhe Osijekut, duket se do t’i bashkohet tjetrës skuadër kroate, Hajduk Split. Edhe pse nuk shënoi ndaj Rijekës, klubi i Rijekës ishte i interesuar për të, ndërsa në garë ishte edhe Olimpija e Lubjanës.
Megjithatë, Pajaziti do të përfundojë te Hajduku, duke u bërë kështu transferimi i parë i drejtorit të ri sportiv të Goran Vučevićit, i cili e kontaktoi personalisht dhe i prezantoi projektin e ri të Hajdukut dhe rolin që do të ketë në skuadër.
Sipas gazetarit të njohur të futbollit, Lorenzo Lepore, e që përcjellin mediat në Kroaci, Pajaziti do të ketë një pagë vjetore mbi 300 mijë euro në Hajduk, shumë që Olimpija e Lubjanës nuk ishte në gjendje ta ofronte.
Pajaziti ka rinovuar së fundmi kontratën me Fulham, por Hajduk nuk do të paguajë asnjë shifër për transferimin e tij. Mesfushori do të shkëputë kontratën me klubin anglez, ndërsa Hajduk dhe Fulham do të ndajnë në mënyrë të barabartë të ardhurat nga një transferim i ardhshëm, me 50 për qind secili.
Trajneri i ri i Hajdukut, Gonzalo Garcia, ka insistuar që nga fillimi për ardhjen e Pajazitit, duke e konsideruar atë si lojtar ideal për mesfushën e tij, që do të pësojë ndryshime të mëdha këtë verë. Garcia vlerëson se Pajaziti, i shpejtë, teknik dhe i lëvizshëm, i plotëson kërkesat për stilin e tij të lojës.
Pajaziti, i lindur në Londër, luan për Kombëtaren Shqiptare, ndërsa ka pasur paraqitje edhe për Përfaqësuesen e Kosovës U21. Karrierën e nisi te Fulham, nga ku u huazua te Haugesund në Norvegji dhe më pas te Gorica në Kroaci. Me Fulhamin ka luajtur vetëm një ndeshje në ekipin e parë, ndërsa në Gorica ka zhvilluar 24 takime. Tani pritet që edhe sezonin e ardhshëm të luajë në SuperSport HNL të Kroacisë. Vlera e tij në Transfermarkt vlerësohet rreth 800 mijë euro.
