Sonte në orën 21:00, Prishtina do të zhvillojë ndeshjen e parë të rrethit të dytë të Konferencë Ligës në stadiumin Ballymena Showgrounds në Irlandën e Veriut, ku do të përballet me skuadrën vendase, Larne.
Ky stadium ka një histori të gjatë dhe të pasur, duke qenë i hapur që nga viti 1903, dhe është një nga stadiumet më të vjetra në rajon, përcjellë “Kërlaçki”.
Për vite me radhë, Ballymena Showgrounds ka qenë shtëpi e futbollit lokal dhe ka kaluar nëpër disa faza rinovimi për t’u përmirësuar vazhdimisht.
Në vitin 2001, stadiumi u rinovua me një investim prej 30 milionë paundësh, duke përfshirë ndërtimin e tribunës së re dhe përmirësimin e infrastrukturës së dhomave të zhveshjes.
Më vonë, në vitin 2010, tribuna Warden Street u rinovua duke rritur kapacitetin e saj në 2,200 ulëse, duke e bërë stadiumin më komod dhe modern për tifozët.
Aktualisht, Ballymena Showgrounds ka një kapacitet nominal prej 4,100 vendeve, megjithatë për arsye sigurie, kapaciteti i lejuar për përdorim është 3,600 vende, duke siguruar një ambient të sigurt dhe komod për tifozët.
Në vitet e fundit, janë planifikuar projekte të mëdha për zhvillimin e mëtejshëm të stadiumit, përfshirë ndërtimin e dy tribunave të reja, instalimin e një fushe hibride 3G dhe një sistem ndriçimi të kategorisë UEFA 3.
Këto përmirësime synojnë ta rrisin kapacitetin në 6,500 vende dhe ta transformojnë Ballymena Showgrounds në një qendër moderne ekselence, me fokus edhe në zhvillimin e futbollit të femrave.
Një nga veçoritë më të rëndësishme të këtij stadiumi është atmosfera e ngrohtë dhe intensive që krijohet gjatë ndeshjeve, falë madhësisë së tij të përshtatshme dhe afërsisë së tifozëve me fushën.
Kjo e bën çdo ndeshje këtu një sfidë të veçantë dhe të vështirë për ekipet mysafire.
Sonte, Prishtina do të kërkojë të marrë një rezultat pozitiv në këtë terren, për të ndërtuar një avantazh para ndeshjes së kthimit në Kosovë.
Trajneri Arsim Thaçi dhe sulmuesi Leotrim Kryeziu, kanë premtuar maksimumin në fushë për të marrë rezultat pozitiv.
Ndeshja fillon prej orës 21:00.
Kryeziu: E dimë sa vlen kjo ndeshje për Prishtinën dhe tifozët tanë
