Federata e Futbollit të Kosovës, në bashkëpunim me sponsorin e Superligës, Albi Mall, ka ndarë çmimin “Ylli i Javës” për xhiron e dytë të kampionatit.
Këtë herë, vlerësimi i ka takuar futbollistit të Dukagjinit, Mërgim Pefqeli.
Vendimi është marrë nga Komisioni i Veteranëve të Futbollit, në përbërje të Vllaznim Visoka, Xhavit Mehmeti dhe Enver Prapashtica, të cilët e kanë vlerësuar Pefqelin si lojtarin më të mirë të javës.
Ai u dallua në fitoren 2:0 kundër SC Gjilanit, ku shënoi një gol dhe ishte ndër më meritorët për tre pikët e klinasve.
Pas marrjes së çmimit, Pefqeli u shpreh i lumtur për vlerësimin dhe theksoi rolin e stafit teknik e bashkëlojtarëve në këtë sukses. Ai falënderoi klubin për përgatitjen taktike dhe për punën gjatë javës, duke theksuar se transferimet e reja si Merisi dhe Zulfija kanë shtuar cilësinë e ekipit dhe do të jenë të rëndësishme për një sezon të gjatë e të vështirë.
“Gol, fitore dhe çmimin ‘Ylli i Javës’ ia dedikoj babait tim të ndjerë, i cili kishte ditëlindjen,” tha Pefqeli për faqen zyrtare të FFK-së.
