Pas pesë ditësh të mbushura me punë intensive dhe atmosferë pozitive, sot ka përfunduar me sukses NLB Kampi Veror i Hendbollit për djem, organizuar nga Federata e Hendbollit e Kosovës. Megjithatë, ky aktivitet i rëndësishëm veror vazhdon – këtë herë me vajzat në fokus.
Që nga sot, në palestrën “Dresha” në Banjë të Pejës ka nisur NLB Kampi Veror për vajza, që do të zgjasë deri më 25 korrik. Në ceremoninë përmbyllëse të fazës së parë, të mbajtur të shtunën në mesditë, morën pjesë figura të rëndësishme të hendbollit dhe institucioneve: presidenti i FHK-së Edin Kolgeci, kryetari i Komunës së Istogut Ilir Ferati, sekretari i përgjithshëm i FSHH-së Armand Cakalli, ai i FHK-së Muhamet Arifi, si dhe përfaqësues të NLB Bankës – sponsorit kryesor të kampit.
Pjesa e parë e kampit është vlerësuar jashtëzakonisht e suksesshme, si nga pjesëmarrësit ashtu edhe nga organizatorët. Përveç hendbollistëve të rinj nga klubet e Kosovës, në kamp morën pjesë edhe anëtarë të Kombëtares U19, lojtarë nga diaspora si dhe nga Shqipëria.
Kampi për vajza ka nisur sot, ndërsa krahas pjesëmarrëseve të rregullta, në Banjë po qëndrojnë edhe hendbollistet e Kosovës U17, të cilat do të kenë mundësinë të përfitojnë nga përvoja dhe puna profesionale që ofron ky kamp.
Drejtor teknik i kampit është Isak Osmani, ndërsa puna me vajzat do të koordinohet nga Faruk Shala – trajner i Istogut dhe kryetar i Shoqatës së Trajnerëve të Hendbollit të Kosovës.
Kampi synon të jetë një platformë zhvillimi për talentet e reja dhe një shtysë për të ardhmen e hendbollit kosovar.
