Një gol i Ruben Neves në minutat shtesë i siguroi Portugalisë një fitore të ngushtë 1:0 ndaj Irlandës, duke e ruajtur bilancin perfekt në Grupin F të kualifikimeve për Kupën e Botës 2026. Ndërkohë, për Irlandën, shpresat për një kualifikim të parë që nga viti 2002 janë thuajse të shuar.
Irlanda nisi me një mbrojtje të disiplinuar, duke i frenuar sulmet e hershme të Portugalisë. Në minutën e 17-të, Cristiano Ronaldo goditi shtyllën nga 20 metra, ndërsa Bernardo Silva humbi një mundësi të pabesueshme në tentativën e dytë, me portën thuajse bosh.
Irlandezët patën një moment presioni në minutën e 25-të, me Jayson Molumby që gjuajti lart mbi portë nga distanca. Portugalia rifitoi kontrollin, por tentimet e Pedro Netos dhe të tjerëve nuk rrezikuan realisht portën.
Në fund të pjesës së parë, një goditje e Vitinhas që u devijua, për pak nuk e befasoi portierin irlandez Caoimhín Kelleher, i cili gjithashtu bëri disa pritje të mira ndaj Gonçalo Inacios dhe Bruno Fernandes. Nathan Collins bëri një ndërhyrje vendimtare për të ndalur Bernardo Silvën në kohën shtesë, duke ndihmuar Irlandën të mbante portën e paprekur në pjesën e parë për herë të parë në këto kualifikime.
Në pjesën e dytë, dominimi i Portugalisë vazhdoi. Ronaldo pati dy raste të mira brenda 10 minutave, ndërsa Neves u ndal nga një pritje e shkëlqyer e Kelleherit pas një goditjeje me rrotullim. Me 20 minuta të mbetura, Nélson Semedo harkoi rrezikshëm në zonë, por Ronaldo edhe një herë goditi jashtë.
Me ndeshjen që po hynte në 15 minutat e fundit, Portugalia fitoi një penallti pas një bllokimi nga Dara O’Shea – edhe pse pati pretendime se topi kishte prekur kraharorin. Ronaldo mori përsipër goditjen, por Kelleher e ndali me këmbë, duke i dhënë sërish shpresë Irlandës.
Por presioni i pandalshëm i Portugalisë u shpërblye në minutat shtesë: një harkim perfekt nga Francisco Trincão u finalizua me kokë nga Rúben Neves – që shënoi golin e tij të parë me fanellën e Portugalisë.
Portugalia regjistron fitoren e gjashtë radhazi në grup dhe vazhdon rrugëtimin drejt Botërorit si lider i pakontestueshëm, ndërsa Irlanda mbetet me vetëm një pikë dhe pa fitore ndaj Portugalisë për më shumë se 20 vite.
