Cristiano Ronaldo shënoi golin e tij të 140-të me kombëtaren, ndërsa Portugalia nisi me një fitore mbresëlënëse fushatën kualifikuese për Kupën e Botës 2026, duke mposhtur Armeninë me rezultat të thellë 5:0 në Jerevan.
Pas triumfit ndaj Spanjës në finalen e UEFA Nations League këtë verë, ekipi i drejtuar nga Roberto Martínez e vazhdoi formën e mirë edhe në këtë cikël kualifikues. Që në pjesën e parë, gjithçka u vendos.
U deshën më pak se 10 minuta për të zhbllokuar ndeshjen – João Félix finalizoi me kokë pas krosimit të João Cancelo-s. Vetëm pak më vonë, Cristiano Ronaldo – i pazëvendësueshëm në repartin ofensiv – shënoi nga afër pas asistimit të Pedro Neto-s, duke çuar në 140 numrin e golave me kombëtaren.
Cancelo, përveç asistit, shënoi edhe vetë me një goditje të fuqishme brenda zonës në minutën e 31-të. Ai festoi me një përshëndetje emocionuese në kujtim të Diogo Jota-s, ish-sulmuesit të Liverpool-it që ndërroi jetë këtë verë.
Menjëherë pas fillimit të pjesës së dytë, Ronaldo e trefishoi epërsinë me një predhë nga 30 metra, duke dëshmuar se vazhdon të jetë një nga finalizuesit më të rrezikshëm në botë.
Portugalia nuk u ndal me kaq – pas disa rasteve të humbura nga Ronaldo dhe Neto, João Félix realizoi edhe golin e dytë personal me një volej të bukur pas një prekjeje të kontrolluar brenda zonës.
Armenia pati një moment rreziku me një gjuajtje të ulët nga Tigran Barseghyan, por Diogo Costa reagoi mirë. Gjithsesi, rezultati kishte marrë drejtim të pakthyeshëm.
Me këtë fitore, Portugalia ngjitet në krye të Grupit F dhe është tashmë e sigurt për të paktën një vend në fazën play-off, megjithatë me këtë formë, duket se nuk do t’i nevojitet.
Armenia, ndërkohë, do të kërkojë të reagojë të martën kundër Irlandës, ndërsa Hungaria është pjesëmarrësja tjetër në grup – ku ende mbetet hapur gara për vendin e dytë.
