Santos, klubi ku dikur shkëlqeu legjenda Pele, po përballet me një sezon dramatik. Pas 15 ndeshjesh, skuadra ka regjistruar nëntë humbje dhe ndodhet në zonën e rënies. Kritikat më të ashpra kanë rënë mbi shpatullat e Neymarit, i cili u rikthye me dëshirën për të ndihmuar klubin që e formoi si lojtar.
Një prej tifozëve e ka fyer publikisht brazilianin, dhe kjo ka lënë gjurmë te sulmuesi që ndjeu nevojën të reagojë.
“Kam ardhur në Santos për të ndihmuar, por nëse tifozët mendojnë se nuk po i sjell më dobi klubit apo se po e dëmtoj, do të jem i pari që do të largohem. Sa kohë që do të kem forcë, do të vrapoj, do të luftoj dhe do të jap gjithçka për këtë emblemë”, tha Neymar me emocion.
Ai ka humbur një pjesë të mirë të sezonit për shkak të një dëmtimi muskular, duke luajtur më pak se gjysmën e ndeshjeve të Santosit. Megjithatë, akuzat se është rikthyer për përfitime financiare i ka hedhur poshtë me indinjatë.
“Nuk do të komentoj kurrë për kritikat ndaj lojës sime, por kur dikush më quan ‘i shitur’ apo fyen familjen time, nuk mund ta pranoj. Më falni, por edhe unë jam njeri dhe ndonjëherë e kam të vështirë të përmbahem”, u shpreh ai.
Pele dhe lidhja me Santosin
Pele, një nga figurat më të mëdha të futbollit botëror, kaloi pothuajse të gjithë karrierën e tij te Santos, ku u bë simbol i klubit dhe i futbollit brazilian. Ai luajti për këtë skuadër nga viti 1956 deri në 1974, duke fituar tituj kombëtarë dhe ndërkombëtarë, dhe duke u bërë ambasadori më i madh i emrit “Santos” në arenën ndërkombëtare.
Historiku i Santosit
Santos FC është themeluar më 14 prill 1912 në qytetin bregdetar Santos, në shtetin Sao Paulo të Brazilit. Është një nga klubet më të suksesshme në historinë e futbollit brazilian, i njohur për prodhimin e talenteve dhe për stilin ofensiv të lojës. Përveç Peles dhe Neymarit, kanë dalë nga akademia e klubit emra si Robinho, Rodrygo dhe shumë të tjerë. Klubi ka fituar disa herë kampionatin brazilian dhe dy herë Kupën e Kampioneve të Amerikës së Jugut (Copa Libertadores).
