Kombëtarja e Shteteve të Bashkuara mbeti e pathyer në Kampionatin Botëror të Volejbollit për Meshkuj 2025, pasi përmbysi Slloveninë me rezultatin 3-1 (19-25, 25-22, 25-17, 25-20) në takimin e zhvilluar të hënën në Mall of Asia Arena.
Amerikanët, të renditur të katërt në botë, e nisën dobët sfidën duke humbur setin e parë, por më pas reaguan fuqishëm dhe fituan tre setet pasuese në një ndeshje që zgjati një orë e 50 minuta. Me këtë fitore, ata kalojnë mes tetë më të mirëve dhe do të përballen të enjten me Bullgarinë, e cila gjithashtu ka ecur pa humbje në këtë turne.
Garcia, ylli i mbrëmjes
Heroi i takimit ishte Gabriel Garcia, i cili shkëlqeu me 26 pikë: shtatë as shërbimi, 15 goditje fituese, katër blloqe dhe 11 pritje. Ethan Champlin dhe Jordan Ewert kontribuan përkatësisht me 15 dhe 14 pikë, ndërsa bllokuesit qendrorë Jeffrey Jendryk II dhe Merrick McHenry shtuan nga tetë pikë.
Kapiteni dhe pasuesi i skuadrës, Micah Christenson, shënoi tri pikë, por mbi të gjitha dirigjoi lojën me 39 pasime perfekte. Liberoja i përvojës së gjatë Erik Shoji realizoi 11 pritje.
“Na duhej kjo vështirësi në setin e parë. Sllovenia shërbeu shumë fort, por ne e rritëm presionin, përmirësuam pritjen dhe ia dolëm të marrim kontrollin. Nuk ishte volejbolli më i bukur që kemi luajtur, por ky ekip di të luftojë dhe të gjejë mënyrën për të fituar”, tha Christenson pas ndeshjes.
Sllovenia ndalet në 1/16
Pavarësisht mungesës së yllit Rok Mozic për shkak dëmtimi në gju, Sllovenia, e renditur e gjashta në botë, zhvilloi një turne të denjë duke arritur në fazën e 1/16-ës. Në ndeshjen ndaj SHBA-së, askush nuk arriti shifrat dyshifrore: Nik Mujanovic shënoi nëntë pikë dhe Ziga Stern tetë.
Ky ishte edicioni më i madh i Kampionatit Botëror, me pjesëmarrjen e 32 kombëtareve.
Bullgaria pret me ambicie
Më herët, Bullgaria mposhti Portugalinë 3-0 (25-19, 25-23, 25-23) dhe u kualifikua për herë të parë në çerekfinale që nga viti 2010. Aleksandar Nikolov udhëhoqi ekipin me 19 pikë, duke synuar të përsërisë apo edhe të tejkalojë suksesin e të atit, Vladimir Nikolov, medalist i bronztë në Botërorin e 2006-ës.
Për Portugalinë, që doli e dyta në grup pas SHBA-së, u dallua Lourenco Martins me 10 pikë.
