Müldür dhe Aktürkoğlu vendimtarë
Turqia ka nisur me fitore fushatën kualifikuese për Kupën e Botës 2026, duke mposhtur Gjeorgjinë me rezultatin 3-2 në “Boris Paichadze Dinamo Arena”, në një sfidë që tregoi ambicien e skuadrës për t’u rikthyer në Botëror për herë të parë që nga suksesi historik në vitin 2002.
Vetëm pas tre minutash lojë, Mert Müldür zhbllokoi rezultatin me një goditje të fuqishme me kokë pas krosimit të saktë të Arda Güler. Ky i fundit, talenti i Real Madridit, u bë sërish protagonist me tentativa të rrezikshme, ndërsa Kerem Aktürkoğlu dyfishoi avantazhin pak para pushimit, duke konfirmuar formën e tij të mirë që nga Liga e Kombeve.
Aktürkoğlu realizoi edhe golin e tretë për Turqinë në minutat e para të pjesës së dytë, duke përfituar nga një gabim i rëndë i mbrojtjes gjeorgjiane. Edhe pse Gjeorgjia reagoi me golin e Davitashvilit pas një aksioni që u nis nga shtylla, momenti më i tensionuar erdhi në minutën e 71-të, kur Barış Alper Yılmaz u ndëshkua me karton të kuq për një ndërhyrje të rrezikshme, ndërsa trajneri i Gjeorgjisë, Willy Sagnol, u përjashtua për protesta.
Në fund, Khvicha Kvaratskhelia shënoi një gol të bukur në kohën shtesë, por ishte tepër vonë për vendasit. Me këtë fitore, Turqia shkon e motivuar në përballjen e radhës ndaj kampionëve të Europës, Spanjës, një duel i shumëpritur në Grupin E.
