Rrugëtimi i Wilfredo Leon drejt Kampionatit Botëror të Volejbollit për Meshkuj “FIVB 2025” ka qenë gjithçka tjetër, përveçse i zakonshëm.
I lindur dhe rritur në Kubë, Leon u konsiderua për vite me radhë si një nga talentet më premtues të volejbollit botëror. Por në vitin 2015, ai mori një vendim që i ndryshoi jetën: braktisi vendlindjen për të ndërtuar një jetë të re në Poloni.
Pas katër vitesh, martesa me bashkëshorten e tij polake, Małgorzata Gronkowska, dhe krijimi i një familjeje i hapën rrugën për të fituar nënshtetësinë polake. Në vitin 2019, Leon mori të drejtën të përfaqësonte Poloninë në arenën ndërkombëtare — dhe ndikimi i tij ishte i menjëhershëm: ndihmoi ekipin të siguronte medaljen e bronztë në Kampionatin Europian dhe atë të argjendtë në Kupën e Botës.
Megjithatë, pandemia COVID-19 ndërpreu hovin e tij, duke i shtyrë më tej ëndrrën për të shkëlqyer në skenat më të mëdha botërore.
Në Lojërat Olimpike të Parisit 2024, Leon realizoi më në fund debutimin me Poloninë, por rrugëtimi përfundoi me zhgënjim në çerekfinale ndaj Francës — që më pas fitoi edhe medaljen e artë.
Dhe kur gjithçka ishte gati për debutimin e shumëpritur në Kampionatin Botëror një vit më pas, një dëmtim në gju e la jashtë fushës.
“Nuk mund ta përshkruaj me fjalë sa shumë e kam dëshiruar këtë moment”, tha Leon pas fitores së Polonisë ndaj Turqisë në çerekfinale të Botërorit 2025.
Sot, i rikthyer në formë të plotë dhe pjesë e një skuadre të kompletuar, Leon e sheh këtë turne jo vetëm si një mundësi për të realizuar ëndrrën e tij, por edhe si një mënyrë për të shpërblyer vendin që i dha një atdhe të dytë.
“Kam punuar shumë dhe e kam pritur gjatë këtë moment. Herën e fundit nuk isha në ekip; këtë herë jam, dhe kam ardhur të luftoj fort”, tha ai. “Nuk e kam ende medaljen e artë — dhe kjo është ajo që më motivon. Kam uri. Dua medalje, dua medalje të arta.”
Polonia në gjysmëfinale takohet me kampionët në fuqi, Italinë këtë të shtunë nga ora 12:30.
