Mbrojtësi gjerman Mats Hummels ka zhvilluar sot ndeshjen e tij të fundit si futbollist profesionist, duke mbajtur shiritin e kapitenit të Borussia Dortmund në miqësoren kundër Juventusit në “Signal Iduna Park”.
37-vjeçari u zëvendësua mes ovacioneve të zjarrta nga tifozët verdhezi, të cilët i dhanë lamtumirën një prej legjendave më të mëdha të klubit. Pas një karriere të pasur me trofe dhe paraqitje të paharrueshme, Hummels i jep fund rrugëtimit të tij në futbollin profesionist.
Mats Hummels ka luajtur gjithsej 498 ndeshje në nivelet më të larta të futbollit të klubeve, duke shënuar 38 gola nga pozicioni i qendrës së mbrojtjes.
Ai është shpallur nënkampion i Bundesligës gjashtë herë dhe ka fituar Kupën e Gjermanisë tri herë, si dhe Superkupën e Gjermanisë disa herë.
Në arenën ndërkombëtare ka përfaqësuar Gjermaninë në 78 ndeshje, duke shënuar 5 gola, dhe ka qenë pjesë e skuadrës kampione të botës në vitin 2014.
Dy herë ka arritur finalen e Ligës së Kampionëve, në vitet 2013 dhe 2024, por pa mundur të fitojë trofeun më të madh të klubeve evropiane.
Në fund të sezonit 2024–25 Hummels njoftoi se do t’i japë fund karrierës së tij pas më shumë se 18 vjetësh në futbollin profesionist.
Jashtë fushës së lojës Hummels është ambasador i UNICEF-it dhe pjesë e iniciativës humanitare Common Goal.
Në vitin 2019 investoi në start-up-in dixhital Street Pro, që synon të përmirësojë trajnimin individual të futbollistëve përmes një aplikacioni mobil.
Është moderator i podcastit “Alleine ist schwer” dhe ka pasur paraqitje në media të ndryshme sportive e kulturore, si ekspert dhe figurë publike.
