FC Sion regjistroi një fitore të rëndësishme 1-0 ndaj Grasshopper Club Zurich në “Letzigrund”, me një paraqitje vendimtare nga shqiptarët në skuadër. Donat Rrudhani realizoi golin e vetëm të takimit nga pika e bardhë, ndërsa Rilind Nivokazi ishte protagonisti kryesor në dy momentet më të rëndësishme të ndeshjes. Kreshnik Hajrizi, nga ana tjetër, dha siguri në prapavijë dhe ishte ndër më të mirët në fushë.
Nivokazi, “makthi” i mbrojtjes së GC-së
Ndeshja u kthye në drejtim të Sion që në minutën e 12-të, kur Rilind Nivokazi fitoi një faull që çoi në përjashtimin me të kuq të Saulo Decarli-t, i cili ishte lojtari i fundit në mbrojtje. Përplasja ishte e diskutueshme, pasi Nivokazi ra lehtë, por pas rishikimit me VAR, arbitri vendosi të ndëshkojë mbrojtësin veteran – i njëjti që ishte ndëshkuar me të kuq edhe në ndeshjen e parë sezonale ndaj Sionit.
Nivokazi vazhdoi të shqetësojë mbrojtjen e GC-së gjatë gjithë pjesës së parë me lëvizjet e tij inteligjente dhe depërtimet me top. Në minutën e 61-të, ai fitoi një tjetër moment vendimtar: Arigoni e tërhoqi nga fanella në zonë dhe pas ndërhyrjes së VAR-it, u akordua penallti për Sionin.
Rrudhani i ftohtë në momentin e duhur
Donat Rrudhani mori përgjegjësinë dhe e shndërroi penalltinë në gol me një goditje të saktë me të majtën, në cepin e djathtë të portës. Ishte goli që vendosi fatin e ndeshjes dhe siguroi tre pikë të arta për ekipin nga Valais. Rrudhani shfaqi qetësi dhe përqendrim maksimal në momentin më të rëndësishëm, duke konfirmuar rolin e tij si një nga lojtarët kyç të skuadrës.
Ishte ky goli i parë sezonal i reprezentuesit kosovar.
Hajrizi, shtyllë e mbrojtjes
Në sfondin e një ndeshjeje të tensionuar dhe me presion të madh në fund, Kreshnik Hajrizi mbajti ekuilibrin në prapavijë. Ai u përball me kundërsulmet e shpejta të Grasshoppers gjatë pjesës së dytë dhe ndihmoi skuadrën të ruajë avantazhin minimal. Qëndrimi i tij i qëndrueshëm ishte vendimtar për të mbajtur portën të paprekur – një tjetër dëshmi e forcës mbrojtëse që ka shfaqur Sion këtë sezon.
Ecuria dhe renditja
Kjo ishte fitorja e dytë e Sionit këtë sezon në “Letzigrund”, dhe ekipi tani ka pësuar vetëm 10 gola në 9 ndeshje – ndër mbrojtjet më të forta në ligë. Sion ngjitet përkohësisht në vendin e katërt, ndërsa GC mbetet në vend të nëntë, duke vuajtur nga dëmtimet dhe kartonët e kuq – i treti radhazi në kampionat.
