Përzgjedhësi i Shqipërisë, Sylvinho, është shprehur krenar me paraqitjen e lojtarëve pas fitores ndaj Letonisë.
Kuqezinjtë triumfuan me rezultat minimal 1:0 të martën në “Air Albania”, duke marrë tre pikë të rëndësishme në kualifikimet për Botërorin 2026.
“Është kundërshtar i vështirë. Janë këto ndeshje që nëse nuk e shënon golin e dytë për ta mbyllur ndeshjen, rrezikon shumë. E kemi vënë re se Letonia që në dy-tri mundësi që ka është e rrezikshme. Kumbulla ndoshta është dashur të përfshihet më herët në lojë. Për ndryshimet në formacion, bëmë ndryshime me Bajramin. Për Gjimshitin dhe Ajetin i jap merita edhe ekipit kundërshtar. Ishte një lloj hezitimi për ta nxjerrë Brojën më herët nga loja, pasi në këtë mënyrë mund të afrohej kundërshtar me zonën tonë”.
“Broja në pjesën e dytë ka pasur disa hapësirë. Ka pasur disa kundërsulme të mira. Në Kombëtare ke mundësi të luash gjashtë-shtatë herë në vit. Broja nuk është nëntëshe tipike. Shfrytëzon hapësirat në fushë dhe depërton brenda”, tha Sylvinho.
Braziliani shtoi se shumë shpejt do të nisë puna për sfidën e radhës kundër Serbisë në tetor.
“Jam shumë krenar për lojtarët e mi. Kemi stërvitur dhjetë ditë për këto dy ndeshje. E kemi parë ndeshjen e kaluar të Letonisë me Serbinë. Nuk mund të them që e kam në mendje fitoren”.
“Pas dy-tri ditësh fillon puna për ndeshjen me Serbinë, pasi të analizojmë ndeshjen e sotme. Asllani është djalë shumë i mirë. Ka bërë rrugëtim shumë të mirë me Kombëtaren tonë. Jam i kënaqur edhe me Nedim Bajramin. Ai dhe Asani po punojnë shumë fortë”, u shpreh Sylvinho.
