Fisnik Gashi, një emër i njohur i futbollit kosovar dhe tashmë trajner i FC Istogut, u prononcua për Kërlaçkin pas fitores së skuadrës së tij në derbin lokal kundër Besës së Pejës, të cilën e mposhtën me rezultat minimal 1-0.
Istogu ka zhvilluar katër ndeshje deri më tani, duke regjistruar një fitore, dy barazime dhe një humbje, me gjithsej pesë pikë të grumbulluara.
Pas ndeshjes, Gashi u shpreh për Kërlaçkin:
“Sot ishte një ndeshje derbi shumë e fortë. Kam luajtur kundër një skuadre dhe një emri të madh siç është Besa. Loja ishte e balancuar, por në momente të caktuara ne ishim më mirë, me disa goditje drejt portës. Fati nuk ishte në anën tonë, pasi kishim mundësi të mbyllnim ndeshjen më herët dhe të ishim më të qetë në fund.”
Sa i përket objektivave të këtij sezoni, ai shtoi:
“Ambiciet e FC Istogut këtë vit janë që të jemi në pjesën e epërme të tabelës me lojëra të mira. Besoj dhe shpresoj që do të jemi konkurrentë me ekipet tjera për një plasman në Superligë.”
