Trajneri i Dritës, Zekirija Ramadani, ka vlerësuar fitoren 2:1 ndaj Differdanget si një hap të rëndësishëm, por jo vendimtar në rrugën drejt fazës së grupeve të Ligës së Konferencës.
Ndeshja e parë u zhvillua të enjten në “Fadil Vokrri”, ndërsa kthimi do të luhet javën e ardhshme në Luksemburg.
“Është vetëm pjesa e parë. E kemi mbaruar 50 për qind të punës e na pret edhe një tjetër. E thash që duhet të jemi të kënaqur me një gol avantazh. Ndodhi ajo që ishte si objektiv primar i joni për të shkuar me një gol avantazh”, tha fillimisht Ramadani.
Ai iu referua edhe paraqitjes jo të mirë të ekipit në kampionat, ku sipas tij kushtet e ndeshjes ndaj Ferizajt kishin ndikuar dukshëm në lodhjen e lojtarëve.
“Ekipi nuk ishte mirë. E kam thënë edhe më herët që nuk duhet lojë të bukur por rezultate. Ndikimi më i madh ishte ajo ndeshja me Ferizajn në bar sintetik me 40 gradë celsius dhe u pa që nuk kemi freskinë e duhur. Në fundjavë tani kemi pushim. Duhet të rigjenerohet ekipi dhe të shohim gabimet e të përsërisim lojën që e kemi pasur në rundin e parë”, deklaroi Ramadani për KTV-në pas ndeshjes.
Ramadani theksoi se motivimi më i madh për futbollistët mbetet vetë pesha e garës ndërkombëtare dhe mundësia për të shkruar histori me klubin gjilanas.
