Sulmuesi i Lirisë, Albion Kurtaj, po kalon një formë të shkëlqyer në fillim të sezonit në Ligën e Parë të Kosovës. Me dy gola dhe një asistim në tri javët e para, ai ka qenë një ndër pikat kyçe të skuadrës prizrenase. Pas fitores së dytë kampionale kundër Tefik Çangës sot (2-0), Kurtaj ka folur ekskluzivisht për Kërlaçki, duke e vlerësuar rëndësinë e golit të shënuar dhe tre pikëve të sotme.
“Një fitore shumë e vlefshme që vjen pas asaj humbjeje, sipas meje të pamerituar, në Mitrovicë kundër Trepçës ’89. Këto tri pikë ishin shumë të mirëseardhura për moralin e ekipit”, u shpreh Kurtaj për Kërlaçkin.
Ai është optimist për ecurinë e Lirisë: “Mendoj se kemi një nisje të mirë. Shikojmë përpara për ta vazhduar këtë seri pozitive si skuadër.”
Në aspektin personal, sulmuesi prizrenas thekson kënaqësinë për formën aktuale: “Jam shumë i kënaqur me këtë fillim me Lirinë. Shpresoj të shënoj sa më shumë gola me këtë fanellë të madhe.”
