Përfaqësuesja e Turqisë në basketboll është kualifikuar për në çerekfinalet e EuroBasketit, pas një fitoreje të vështirë ndaj Suedisë me rezultatin 85:79.
Pas ndeshjes, trajneri Ergin Ataman komentoi situatën e ekipit dhe presionin që vjen me statusin e favoritit:
“Para ndeshjes ndihesha sikur ishim në fillim të turneut. Analizova Suedinë kundër Finlandës dhe Lituanisë dhe pashë që janë një skuadër shumë e rrezikshme. Të gjithë mendojnë se Turqia është favorite, si në këtë ndeshje, ashtu edhe në të gjithë turneun – dhe kjo është shumë e rrezikshme. Sidomos kur luan në mëngjes. Herën e fundit që kam përjetuar diçka të tillë në një turne të FIBA-s ka qenë para 30 vitesh në konkurrencën për të rinj. Kjo është shumë e vështirë për lojtarët në këtë nivel, ndaj dhe kam protestuar vazhdimisht”, tha Ataman.
Ai shtoi:
“Ky është një turne me konkurrencë të jashtëzakonshme dhe prandaj më është e vështirë të kuptoj një mentalitet të tillë. E nisëm shumë butë kundër Suedisë dhe nuk u zgjuam menjëherë, por kur kuptuam se ku ishim dhe çfarë po ndodhte, gjithçka nisi të shkonte më mirë. Nëse i jep Suedisë vetëbesim, do ta kesh shumë të vështirë. Gjetëm mënyrën për të fituar dhe tani mendojmë për çerekfinalen – të cilën shpresoj që ta luajmë në një orar normal, përveç nëse vendosin sërish ta kalojnë në orën 11:00 në mëngjes.”
