David i jep fitoren Juventusit të Tudor ndaj Parmës

Juventusi e nisi me sukses sezonin e ri të Serie A, duke mposhtur Parmën 2-0 në “Allianz Stadium” dhe duke e zgjatur ecurinë negative të mysafirëve në vitin 2025 – vetëm tre fitore në 21 ndeshje të kampionatit (9 barazime, 9 humbje).

“Zonja e Vjetër” e nisi kampionatin për të tretin vit radhazi me një trajner të ri në stolin kryesor, me Igor Tudor që synon të ngushtojë diferencën me kampionët e Napolit. Juventusi dominoi në pjesën e parë, por mungesa e saktësisë në zonën e rrezikut i prishi punë në sulm. Debutuesi Jonathan David ishte aktiv, por pa gjetur hapësirën e duhur për të goditur. Rasti më i rrezikshëm erdhi kur portieri i Parmës, Zion Suzuki, devijoi me vështirësi një goditje me kokë të Francisco Conceição. Në pushim, rezultati mbeti i bardhë.

Parma u tregua pasive në pjesën e parë, por pas rikthimit në fushë pati shansin më të madh, kur Pontus Almqvist gjeti Mateo Pellegrinon në zonë, por tentativa e tij u ndal nga Gleison Bremer. Reagimi i Juventusit nuk vonoi: Gatti dhe Yıldız provuan pa sukses nga distanca, ndërsa Conceição pa topin e tij të devijohej në shtyllë. Presioni bardhezi u shpërblye në minutën e 59-të, kur Kenan Yıldız dhuroi një asist perfekt për David, i cili shënoi golin e tij të parë me fanellën e Juventusit.

Ky ishte goli i parë i Juventusit si skuadër që hap rezultatin pas katër përballjesh me Parmën. Vetëm pritja e jashtëzakonshme e Suzuki ndaj Yıldız-it e shmangu golin e dytë menjëherë. Tensioni u shtua kur Andrea Cambiaso u ndëshkua me karton të kuq pas një gjesti të shëmtuar ndaj Mathias Løvik, duke lënë vendasit me dhjetë lojtarë. Megjithatë, Juventusi reagoi menjëherë dhe vulosi rezultatin, pasi sulmuesi serb Dushan Vlahoviç shënoi nga një tjetër pasim i Yıldız-it.

Me këtë fitore, Juventusi i rikthehet suksesit pas tre përballjesh ndaj Parmës, ndërsa debutimi i trajnerit Carlos Cuesta në stolin verdheblu u mbyll me humbje. Parma tregoi disa shenja pozitive, por seria e dobët mbetet shqetësuese, veçanërisht me Atalantën si kundërshtar në ndeshjen e radhës.