Trajneri i Dinamos, Ilir Daja, u shfaq sot para gazetarëve në konferencën për shtyp përpara sfidës së nesërme ndaj Jagiellonias, që do të luhet në stadiumin “Air Albania”, e vlefshme për fazën play-off të Conference League.
“Nesër na pret një kundërshtar shumë i fortë, siç e tregoi edhe ndeshja e parë. Jagiellonia është një skuadër që sezonin e kaluar u eliminua në çerekfinale nga Real Betisi, ndaj përballja është e vështirë. Ne kemi hasur disa vështirësi me largimet dhe afrimet në skuadër. Lojtarët e rinj kanë nevojë për kohë që të përshtaten, ndërsa disa të tjerë janë rikthyer nga dëmtimet vetëm në seancën e parafundit dhe mbeten në dyshim për formacionin. Ndoshta do të mund t’i aktivizojmë për pak minuta”, u shpreh Daja.
Ai theksoi se Dinamo do të kërkojë të japë një paraqitje dinjitoze, pavarësisht vështirësive. “Do të bëjmë më të mirën për të përfaqësuar sa më mirë Dinamon në këtë sfidë. Në futboll nuk mund të thuash kurrë kurrë, por e dimë që është një mision i vështirë”, shtoi trajneri.
“Fakti që Dinamo është kthyer në arenën europiane pas 15 vitesh dhe ka arritur deri në play-off është vetë një arritje e madhe. Mendoj se kemi dhënë maksimumin. Ndoshta, me të gjithë lojtarët në dispozicion, do të kishim bërë edhe më shumë”, deklaroi ai.
“Do të hyjmë në fushë me motivim maksimal, por nuk do të luajmë në mënyrë të shfrenuar, pasi përballë kemi një ekip me sulm shumë të rrezikshëm”, ka përfunduar Daja.
Sfida mes Dinamos dhe Jagiellonias luhet të enjten në mbrëmje në stadiumin “Air Albania”, ku skuadra shqiptare do të tentojë një përmbysje të vështirë, por jo të pamundur.
