Kryetrajneri Sallah Sherifi po e udhëheq me sukses ekipin e Kikës nga Hogoshti, dy herë nënkampion të Kosovës viteve 90-ta, i cili këtë sezon po tregohet “arrë e fortë” në Ligën e Parë.
Skuadra nga Hogoshti sot regjistroi një fitore të rëndësishme në Prishtinë, duke mposhtur 2 Korrikun vendas me rezultat 2-0. Pas katër javësh kampionat, Kika numëron dy fitore dhe dy barazime, duke mbetur ndër ekipet e pamposhtura të garës.
Pas ndeshjes, trajneri Sherifi u shpreh për Kërlaçkin:
“Lojë shumë e disiplinuar dhe lojtarët i kanë kryer detyrat taktike duke treguar karakter të fortë. Edhe 2 Korriku u tregua skuadër shumë e mirë dhe pati disa raste të mira për shënim. Falënderoj futbollistët për angazhim dhe përkushtim të madh, mendoj plotësisht fitore e merituar.”
Sa i përket objektivave të sezonit, ai u shpreh:
“Ambiciet tona janë që të paraqitemi sa më mirë në kampionat. Kemi një grup futbollistësh shumë të ri, por edhe disa lojtarë me përvojë që do të na ndihmojnë gjatë rrugës.”
