Kampioni i Kosovës, Drita, ka arritur një sukses historik në futbollin kosovar, duke fituar edhe ndeshjen e kthimit të play-offit të Ligës së Konferencës ndaj Differdange me rezultat 1-0 në Luksemburg, një javë pas fitores 2-1 në Prishtinë.
Gol vendimtar për Dritën shënoi Besnik Krasniqi nga pika e bardhë, duke garantuar kualifikimin për herë të parë në fazën e grupeve të UEFA-s – një arritje e jashtëzakonshme për klubin gjilanas.
Ky sukses nuk ka vetëm rëndësi sportive, por edhe financiare. Sipas rregullave të UEFA-s, pjesëmarrja në fazën e grupeve siguron një shpërblim bazë prej 3.170.000 eurosh. Përveç kësaj, çdo fitore në fazën e grupeve sjell 400.000 euro shtesë, ndërsa çdo barazim 133.000 euro, duke e rritur ndjeshëm potencialin financiar të klubit dhe mundësinë për përforcime dhe zhvillim të mëtejshëm të akademisë dhe infrastrukturës.
Trajneri Zekirija Ramadani dhe futbollistët e tij janë krenarë për këtë arritje historike, duke bërë Dritën jo vetëm krenari të qytetit të Gjilanit, por edhe ambasadore të futbollit kosovar në arenën evropiane.
