Mario Ilievski është një nga përforcimet më të rëndësishme të FC Prishtinës për këtë sezon, në përpjekjet e klubit për të rritur fuqinë sulmuese.
Sulmuesi maqedonas e ka nisur në mënyrë ideale aventurën e tij në kryeqytet, duke shënuar dy gola në dy ndeshjet e para të kampionatit.
Fillimisht, ai gjeti rrugën e rrjetës në fitoren dramatike të Prishtinës si mysafir ndaj Dukagjinit me rezultat 3-2, ndërsa në ndeshjen e dytë, para tifozëve në stadiumin “Fadil Vokrri”, konfirmoi formën e lartë duke realizuar sërish në triumfin bindës 3-0 kundër Llapit.
Të dy golat e tij ishin hapës të ndeshjes, dhe Ilievski tregoi instiktin e një “gjuetari të zonës”, pasi të dyja erdhën nga pozita pothuajse identike brenda 16-shes.
Me klube si CSKA 1948 dhe Septemvri Sofia në Bullgari, Kisvárda në Hungari dhe Tikves në Maqedoni, Ilievski sjell një CV të pasur dhe solide për futbollin tonë. Ai iu bashkua Prishtinës gjatë afatit kalimtar veror, duke ardhur pikërisht nga CSKA 1948, dhe që nga dita e parë ka dëshmuar se është një përforcim i qëlluar.
Edhe pse Prishtina ka në dispozicion sulmues si Leotrim Kryeziu dhe Alban Shillova, duket se trajneri Arsim Thaçi i ka dhënë besimin kryesor maqedonasit, i cili deri tani e ka shpërblyer plotësisht.
Sezoni i kaluar tregoi qartë se bardhekaltërit vuajtën më së shumti në repartin ofensiv, pasi as Sunday Akinbule e as Alex Gnapi, pavarësisht angazhimit dhe lojës së mirë, nuk arritën të ishin vendimtarë para portës.
Prandaj sot shtrohet pyetja: a e ka gjetur më në fund Prishtina sulmuesin e shumëkërkuar? Që nga largimi i Jalen Blesa në Rumani, kryeqytetasit nuk kanë pasur një “bomber” që kalon kuotën e 10 golave për sezon, ndërsa starti i Ilievskit ngjall shpresën se ky vit mund të jetë ndryshe.
