Kampionati Botëror i Volejbollit për Femra në Tajlandë ka hyrë në fazën më të nxehtë. Pas dueleve të së hënës, dy nga skuadrat më të forta të turneut – Turqia dhe Shtetet e Bashkuara të Amerikës – kanë siguruar biletën për në çerekfinale, duke u bashkuar me Holandën, Japoninë, Italinë, Poloninë, Brazilin dhe Francën.
SHBA pa mëshirë ndaj Kanadasë
Amerikanet, të cilat ishin favorite absolute përballë fqinjëve nga veriu, nuk zhgënjyen. Ato triumfuan me rezultat të pastër 3-0 (25:18, 25:21, 25:21), duke treguar epërsi në çdo aspekt të lojës – nga mbrojtja në rrjet me 11 bllokime, te sulmi me 42 goditje të suksesshme. Avery Skinner dhe Sarah Franklin udhëhoqën me nga 13 pikë secila, ndërsa Madisen Skinner shtoi 12. Fitorja i çon amerikane drejt një përballjeje shumë të fortë në çerekfinale.
Turqia kthen sfidën e vështirë në fitore të madhe
Më vonë, Turqia mposhti Slloveninë me 3-0 (30:28, 25:13, 29:27), në një ndeshje ku debutueset sllovene luftuan denjësisht në setin e parë dhe të tretë, por nuk patën forcë për më shumë. Melissa Vargas shkëlqeu me 20 pikë, ndërsa kapitenia legjendare Eda Erdem regjistroi 17 pikë dhe mbylli ndeshjen me një “ace” vendimtar. Turqia konfirmoi statusin e saj si një nga kandidatët kryesorë për titullin e parë botëror.
Çerekfinalet e mëdha
Tashmë tetë skuadrat më të mira janë të njohura, dhe emocionet pritet të rriten edhe më shumë:
-
Holanda – Japonia (3 shtator)
-
Italia – Polonia (3 shtator)
-
Brazili – Franca (4 shtator)
-
SHBA – Turqia (4 shtator)
Përballja SHBA – Turqi është cilësuar si një finale e parakohshme, pasi dy superfuqi të volejbollit do të matin forcat që në këtë fazë. Amerikanet kërkojnë të mbrojnë prestigjin dhe traditën, ndërsa turket, të uritura për trofeun e parë botëror, janë të vendosura të shfrytëzojnë momentin e tyre të artë.
