Gjatë ditëve të para të sezonit 2025/26 të Premier League, në tribunat e stadiumeve u zbuluan disa banderola dhe shfaqje të mëdha të njohura si tifo.
Këto shfaqje janë një formë unike mbështetjeje nga tifozët për ekipet dhe lojtarët e tyre të preferuar.
Ato mendohet të kenë origjinën në Itali dhe Evropën Jugore – shkruan faqja zyrtare e Premierligës, transmeton “Kërlaçki.com” – ku tifozët shprehin mbështetjen dhe entuziazmin e tyre përmes banderolave të mëdha ose shfaqjeve të koordinuara me flamuj dhe karta.
Një tifo mund të jetë një banderolë e madhe me një imazh ose mesazh specifik, e shpalosur përgjatë një tribune të tërë, ose një mozaik i formuar nga flamuj ose copa kartoni të mbajtura nga tifozë të ndryshëm që bashkohen për të krijuar një pamje të përbashkët.
Liverpool nderoi ish-futbollistin e skuadrës Diogo Jota dhe vëllain e tij Andre Silva, me një koreografi gjigante në dy tribunat e “Anfield”, në ndeshjen e parë të kampionatit të ri ndaj Bournemouth të premten.
Wolverhampton Wanderers nderuan me emocion ish-lojtarin e tyre Diogo Jota, i cili ndërroi jetë këtë verë, si dhe vëllain e tij Andre Silva. Para ndeshjes kundër Manchester City, tifozët e Wolves zbuluan një banderolë me Jotan duke festuar një nga golat e tij për klubin, së bashku me mesazhin: “Do të të kujtojmë kur të ecësh në fushat e arit.”
Sunderland festoi rikthimin në Premier League pas tetë vitesh mungesë me një shfaqje të Lambton Worm, një mit lokal për një kalorës të quajtur John Lambton që mposht një krijesë gjigante në formë krimbi.
Aston Villa shprehu admirimin për trajnerin Unai Emery me një banderolë ku ishte portreti i tij dhe mesazhi: “Pa kufij për ëndrrat tona.”
Nottingham Forest krijoi një mozaik shumëngjyrësh për të shoqëruar fjalët e ambientalistit të shekullit të 19-të, John Muir: “Dhe në pyll shkoj për të humbur mendjen dhe për të gjetur shpirtin tim.”
